Xəbərlər
08 iyun 2017
5 806
Təhsil Nazirliyinin təklifi narazılığa səbəb olub
SSRİ dövründə ali məktəblərdə mövcud olmuş hazırlıq şöbələrinin bərpası barədə qanuna dəyişiklik cəmiyyətdə birmənalı qarşılanmır.
Aztehsil.com xəbər verir ki, Təhsil Nazirliyinin təklif etdiyi dəyişikliklərə əsasən, universitetlərin nəzdində ödənişli hazırlıq şöbələri vasitəsilə bakalavr pilləsinə imtahan vermədən qəbul həyata keçiriləcək. Ölkənin tanınmış ictimaiyyət nümayəndələri, o cümlədən bəzi deputat və təhsil işçiləri hazırlıq şöbələrinin bərpasına qarşı çıxırlar. Onlar hesab edirlər ki, tələbə qəbulunun mərkəzləşdirilmiş qaydada test üsulu ilə aparıldığı indiki şəraitdə hazırlıq şöbələrinin bərpa olunması ölkədə təhsilin səviyyəsini bir az da ucuzlaşdıracaq.
"Odlar Yurdu” Universitetinin rektoru, keçmiş deputat Əhməd Vəliyev isə Modern.az-a açıqlamasında bu dəyişikliyi yaxşı istiqamətlərdə atılan addım kimi qiymətləndirib: "Mənə elə gəlir ki, bu barədə Təhsil Nazirliyi qərar verib. Bu çox düzgün qərardır. Çünki gənclər bir il müddətində universitetlərin nəzdində açılacaq hazırlıq kurslarında hazırlaşacaq və həmin istiqamət üzrə təhsillərini davam etdirə biləcəklər. Bundan yaxşı qərar ola bilməz. Orta məktəblərdə məktəbəqədər təhsil müəssisələri var. Bu da hazırlıq rolunu oynayır. "Təhsil haqqında” qanuna gözlənilən dəyişiklik də bunun yuxarı pilləsidir. Bu dəyişiklik təhsilimizin inkişafına yönəlib. Yaxşı təhsil almaq üçün baza olmalıdır. Burada da həmin bazanın təmin olunmasından söhbət gedir”.
Rektor bu dəyişikliyə qarşı çıxan deputatların düzgün fikirləşmədiyini deyib: "Hazırlıq qruplarına tələbə qəbulunun test üsulu üzrə imtahanların nəticələrinə görə aparılması nəzərdə tutulduğu üçün bu qruplarda qəbul zamanı şəffaflıq tam təmin ediləcək. Hazırlıq qruplarında təhsil alanlar bir illik təhsil müddəti başa çatdıqdan sonra yalnız buraxılış imtahanlarını müvəffəqiyyətlə verdikdə ali məktəblərə daxil olmaq hüququ qazana biləcəklər. Ona görə də mən burada hər hansı bir neqativ halların olacağına inanmır”.
