Xəbərlər
05 iyun 2017
3 446
Təhsil naziri Göyçayda vətəndaşları qəbul edib
Təhsil naziri Mikayıl Cabbarov Göyçay şəhərindəki Heydər Əliyev Mərkəzində vətəndaşları qəbul edib.
Aztehsil.com apa-ya istinadən xəbər verir ki, nazir M.Cabbarov qəbul zamanı Ucar, Zərdab, Göyçay və Ağcabədi rayonlarının sakinlərini, eləcə də həmin rayonlarda müvəqqəti məskunlaşmış məcburi köçkünlərlə görüşərək onların şikayət və təkliflərini dinləyib.
Vətəndaşların müraciətləri əsasən işlə təmin olunmaq, diplomların tanınmasında yaranan problemlər, tələbələrin təhsil aldığı bir ali məktəbdən digərinə keçirilməsi, xaricdə təhsil, yeni məktəblərin tikilməsi və ya əsaslı təmiri ilə bağlı olub.
Qəbul zamanı vətəndaşları narahat edən bir sıra məsələlər yerindəcə həllini tapıb. Nazir vətəndaşların səsləndirdikləri müraciət və şikayətlərlə əlaqədar aidiyyəti qurumların rəhbərlərinə müəyyən göstəriş və tapşırıqlar verib, aidiyyəti üzrə olmayan digər müraciətlər isə müvafiq qurumlara çatdırılması üçün qeydiyyata alınıb.
