Məktəbəqədər təhsil müəssisələrinə qeydiyyatın vaxtı açıqlanıb
"Məktəbəqədər təhsil müəssisələrinə ərizələrin onlayn qeydiyyatına 16 iyul 2024-cü il saat 11:00-da start veriləcək".
Bunu "Məktəbəqədər təhsil müəssisələrinə elektron sənəd qəbulu", "Məktəbəhazırlıq qruplarına və I sinfə qəbul" ilə bağlı jurnalistlər üçün keçirilən brifinqdə Agentliyin direktor müavini Orxan Abbasov deyib.
O bildirib ki, 2022-ci ildən bu tərəfə Məktəbəqədər təhsil müəssisələrində (uşaq bağçalarında) yeniliklər həyata keçirilib:
"Uşaqların təhsil müəssisəsinə növbəyə yazılma prosesi Regional Təhsil İdarələri və Naxçıvan Muxtar Respublikası üzrə 19 iyul, Bakı şəhəri üzrə isə 26 iyul tarixindən başlayacaq. Təhsil müəssisəsinə yeni qəbul olunmuş uşaqlar qrupların komplektləşdirilməsi prosesi başa çatdıqdan sonra cari ilin sentyabrın 1-dən etibarən tədrisə başlaya bilərlər. Boş yerlərə qəbul il ərzində aparılır. Dövlət məktəbəqədər təhsil müəssisələrinə uşaqların qəbulu elektron qaydada www.bq.edu.az elektron sənəd qəbulu sistemi vasitəsilə aparılır.
16 may 2024-cü il tarixindən etibarən elektron sistem üzrə növbələrin yaradılması müvəqqəti olaraq məhdudlaşdırılıb. Hər hansı səbəbdən elektron sistemdə qeydiyyatı şəxsən aparmaq imkanı olmayan valideynlər əvvəlcədən müəyyən edilmiş "ASAN xidmət" mərkəzlərinə müraciət edə bilərlər. Qeydiyyat üçün uşağın şəxsiyyət vəsiqəsinin olması yaxşıdır", - deyə o qeyd edib.
