"Kurikulum təkmilləşməlidir, ləğv edilməməlidir. Bunu tələb etmək çox gülünc görsənir”

Kurikulum sisteminin hansı anlama gəldiyi, əsasları haqqında ətraflı şəkildə yazmışdıq.

Kurikulumun ləğvini tələb edənlərin çox olması təhsil ekspertlərini, kurikulum sahəsində peşəkar təlim keçənləri çox narahat edir. Aztehsil.com xəbər verir ki, Əməkdar müəllim, 2 dəfə "İlin ən yaxşı müəllimi” seçilən, beynəlxalq konfransların iştirakçısı, kurikulum sahəsi üzrə peşəkar təlimçi, təhsil sahəsi üzrə ekspert Zabul Əhmədov açıqlama verərək kurikulumun ləğvini tələb edənlərə cavab verib.

Təhsil eksperti qeyd etdi ki, hər bir yeni ideyanın, yeniliyin tətbiq edilməsi zamanı müqavimətlərin olması normal haldır. "2004-cü ildən dövlət proqramlarının fəal təlimçisiyəm. Müəllimlər bu sistemi tam mənimsəmək üçün nə ənənəvi üsula, nə də kurikuluma keçirlər. Test üsulu ilə hazırlıq yoxlamaq deməkdir. Köhnə qaydada əzbərləyib danışmaqla artıq iş bitmir. Kurikulumun ləğvini tələb edən müəllimlər müasir metodu tətbiq edə bilmirlər. Ona görə də köhnə sistemi istəyirlər. Müəllimlərin çoxu bu fikirdədir ki, uşaqlar kurikuluma keçəndən nitq qabiliyyəti pozulub. Əgər müəllimlər qrup işini vaxtlı -vaxtında apararsa, təqdimat təşkil edərsə dərs prosesində uşaqlarda çox gözəl nitq formalaşar, fikrini düzgün ifadə etməyi öyrənə bilərlər. Amma müəllimlər bunu həyata keçirmirlər. Fəal təlimin mərhələlərindən biri olan təqdimatla informasiya müzakirəsi aparmırlar”.

"Kurikulumun ləğvini tələb edən müəllimlər müasir metodu tətbiq edə bilmirlər”

Ekspert müəllimlərin kurikulum sisteminə keçəndən bəri şagirdlərin yazma qabiliyyətlərinin itməsinə dair fikirlərinə münasibət bildirib. "Kurikulum sistemində əksinə müəllim hər dərsin sonunda uşaqlara 10-15 cümlədən ibarət esse yazdırmalıdır. Şagird keçirilən dərsin əsasında fikirləşir və öz düşüncələrini qısa inşa kimi formalaşdırıb yazır. Müəllimlər bunu etmirlər, nəticədə uşağın yazma qabiliyyəti pozulur. Əgər müəllimlər mərhələləri düz keçsələr, uşaqlarda yazı mədəniyyəti günü-gündən daha da yaxşı formalaşar”.

Əməkdar müəllim köhnə tədris metodu ilə kurikulumu müqayisə edərkən qeyd edib ki, ənənəvi kurikulumda şagirdlər hər şeyi bilirdilər, amma tətbiq etməyi bacarmırdılar. "Müasir kurikulumda şagird həm də öyrəndiklərini tətbiq edə bilir. Əvvəl uşaq əzbərləyirdi, indi isə yeni təlim prosesində bildiklərini praktiki cəhətdən tətbiq edir. Hər şey birdən-birə idial olmur. Təkmilləşməli, düzəlişlər edilməlidir. Müəllim dərs prosesini düzgün bölərsə, şagirdlər daha çox bilik və bacarıq əldə edə bilərlər.

Zabul Əhmədov dərsliklərin qüsurlu olmağına münasibət bildirərkən qeyd etdi ki, hər şeyin ilkində müəyyən qüsurlar ola bilər. "Dərsliyin yazılışına həm fizioloq, həm psixoloq iştirak etməlidir. Məzmun əhatə edilməli, uşağın psixoloji vəziyyəti də nəzərə alınmalıdır. Kurikulum təkmilləşməlidir, ləğv edilməməlidir. Bunun tələb etmək çox gülünc görsənir”.

a24.az