Bu ölkə 4 günlük iş qrafikinə keçir - İŞÇİLƏRİN SAĞLAMLIĞI ÜÇÜN...

Növbəti altı ay ərzində Portuqaliyada 40-a yaxın şirkət həftədə dörd günlük iş qrafiki ilə çalışacaq. Hökumətin maliyyə dəstəyi ilə başlayan pilot layihədə şirkətlərin təcrübələri izləniləcək və tətbiqin iqtisadi, sosial və ekoloji təsirləri qiymətləndiriləcək.

Layihə qısaldılmış iş saatlarının işçilərin fiziki və psixi sağlamlığına təsirini ölçmək məqsədi daşıyır.

Portuqaliyanın əmək, həmrəylik və sosial təminat naziri Ana Mendes Qodinyo pilot layihənin məşğulluq üçün önəmli olduğunu bildirib.

“Bu, tarixən yüksək məşğulluq səviyyəsinə malik istedadları cəlb etmək və saxlamaqda maraqlı olan bir ölkədə əmək bazarında həyata keçirdiyimiz çoxsaylı dəyişikliklərdən birinin başlanğıcıdır”,-deyə nazir qeyd edibş=.

Layihənin müəllifləri işçiləri cəlb etmək, məhsuldarlığı və innovasiyanı artırmaq üçün iş-həyat balansının vacib olduğunu deyirlər.

Son 30 ildə istifadə olunan texnologiyadan, ünsiyyət sürətindən, görülən işlərdən tutmuş uzunömürlülük və qadınların cəmiyyətdəki yerinə qədər çox şeyin dəyişdiyini, lakin işin təşkilinin hələ də davam etdiyini vurğulayan mütəxəssislər bu qrafikin dəyişməsinin önəmli olduğunu düşünürlər.

“Biz inanırıq ki, 21-ci əsrdə həftədə dörd gün işləmək işin təşkili üçün daha səmərəli və dayanıqlı bir üsul olacaq. İşçilərə, iş yerlərinə və iqtisadiyyata daha çox fayda gətirəcək”.

Qeyd edək ki, qısaldılmış iş saatlarının işçilərin fiziki və ruhi sağlamlığına təsirini ölçmək məqsədi daşıyan layihə çərçivəsində iştirakçıların maaşları eyni qalarkən iş saatları azaldılır. Lakin layihədə könüllü iştirak edən şirkətlər istənilən vaxt maliyyə təzminatı olmadan proqramdan çıxa bilərlər. Şirkətlər bildirirlər ki, layihədə iştirak etmək üçün əsas motivasiya işçilərin stress və tükənmişlik səviyyələrini azaltmaq və işçilərin saxlanması baxımından asanlaşma təmin etməkdir.