Xəbərlər
24 may 2017
2 717
"Magistr-2017" müsabiqəsinin qalibləri mükafatlandırılıb
Azərbayccan Milli Elmlər Akademiyası (AMEA) Rəyasət Heyətinin iclasında AMEA prezidenti Akif Əlizadə "Magistr-2017" müsabiqəsinin qaliblərinə mükafat təqdim edib.
APA-nın verdiyi məlumata görə, AMEA prezidentinin 23 yanvar 2017-ci il tarixli sərəncamına əsasən AMEA-nın magistraturasında təhsil alan tələbələr arasında "Magistr-2017" müsabiqəsi elan edilib.
Müsabiqədə iştirak etmək üçün 45 magistr sənədlərini AMAE Rəyasət Heyəti Aparatının Elm və təhsil idarəsinə təqdim edib. Təqdim edilən sənədlərin təhlili AMEA prezidentinin 27 aprel 2017-ci il tarixli sərəncamı ilə yaradılmış ekspert komissiyası tərəfindən həyata keçirilib. Komissiya bir sıra meyarlar, o cümlədən tələbələrin magistraturaya qəbul imtahanlarında topladığı balları, onların imtahan sessiyalarında qazandıqları ümumi orta müvəffəqiyyət göstəricilərini, yerli və xarici jurnallarda nəşr olunmuş elmi məqalələrini, təcrübə keçməni, konfrans və ictimai tədbirlərdə iştirakını nəzərə alıb. "Magistr-2017" müsabiqəsinin nəticələrinə görə 8 magistrant mükafatlandırılıb. İki nəfər birinci yerə (birinci dərəcəli diplom və 1500 manat mükafat), 2 nəfər ikinci yerə (ikinci dərəcəli diplom və 1000 manat mükafat), 4 nəfər üçüncü yerə (üçüncü dərəcəli diplom 500 manat) layiq görülüb.
