Xəbərlər
15 may 2017
3 868
Sumqayıt Dövlət Universitetindən I vitse-prezidentə şikayət edən tələbəylə bağlı AÇIQLAMA
Dünən moderator.az-a istinadən "SDU tələbəsi I Vitse- Prezidentə şikayət etdi" başlıqlı yazı vermişdik. Yazıda Sumqayıt Dövlət Universitetinin Tarix və coğrafiya fakultəsinin IV kurs, 869 N-li qrup tələbəsi Şirinov Şahmar Rəsul oğlu əsassız yerə SDU-dan xaric edildiyini iddia edirdi. Və bununla bağlı ölkənin birinci vitse-prezidenti Mehriban Əliyeva müraciət ünvanlamışdı.
Bu gün SDU-nun Mətbaut Xidməti tərəfindən Şirinov Şahmar Rəsul oğlunun universitetdən xaric edilməsinə aydınlıq gətirilib. Bildirilib ki, Şirinov Şahmar Rəsul oğlunun təhsil haqqını ödədiyi halda universitetdən xaric edilməsi haqqında şikayət məktubunun heç bir əsası yoxdur:
"Sumqayıt Dövlət Universitetinin Tarix və coğrafiya fakültəsinin IV kurs, 869 saylı qrupunun sabiq tələbəsi Şirinov Şahmar Rəsul oğlunun şikayət məktubuna cavab olaraq bildiririk ki, Şirinov Şahmar 2013-cü ildə 271 balla Azərbaycan Müəllimlər İnstitutunun Sumqayıt filialına "Tarix və coğrafiya müəllimliyi” ixtisasının əyani şöbəsinə daxil olmuş, 2 il həmin filialda təhsil almışdır. Filial Azərbaycan Respublikası Prezidentinin 24 iyul 2015-ci il tarixli Sərəncamına əsasən ləğv edilmişdir. Bundan sonra təhsil nazirinin sərəncamına əsasən filialın bütövlükdə öz maddi-texniki bazası, pedaqoji və tələbə heyəti ilə birlikdə Sumqayıt Dövlət Universitetinin nəzdinə keçirilmişdir.
Filialın tələbələrinin şəxsi işlərini qəbul edən zaman Şirinov Şahmar Rəsul oğlunun şəxsi işində hər il 1300 AZN təhsil haqqı ödəməli olduğunu göstərən onunla bağlanmış müqavilə, eyni zamanda həmin filialın baş mühasibinin imzası ilə tələbə Şirinov Şahmar Rəsul oğlunun 2300 manat təhsil haqqı borcunun olması barədə də sənəd var.
Məlumat üçün bildirək ki, həmin vaxt tək Şirinov Şahmar Rəsul oğlu deyil, bir neçə tələbənin təhsil haqqı borcu olmuşdur. Həmin tələbələr I-II kursdan borcu qalmış təhsil haqqını sonrakı təhsil illəri ərzində ödəmişlər. Şirinov Şahmarın təhsil haqqını dəfələrlə (2 ilə yaxın bir müddət ərzində) ödəməsi barədə ona məlumat verdikdə, o I-II kurslarda təhsil haqqından azad olmasını bildirib. Lakin Şirinov Şahmarın təhsil haqqından azad olunması haqqında heç bir rəsmi sənəd yoxdur.
Qeyd edək ki, tələbənin valideyini universitetə dəvət olunmuş, fakültə dekanı, Tədris metodik mərkəzin direktoru ilə görüşmüşdür. Valideyininə görüş zamanı bildirilmişdir ki, IV kursda oxuyan tələbənin universiteti bitirə bilməsi üçün təhsil haqqı borcu qalmamalıdır. Onlara təhsil haqqını ödəmək üçün kifayət qədər möhlət verilmişdir. Lakin valideyn isə bildirmişdir ki, təhsil haqqını ödəyə bilməyəcəkdir".
moderator.az
