Xəbərlər / Müəllim
08 sentyabr 2021
1 573
"Əyani təhsilin bütün il boyu davamlı və dayanıqlı olacağı kimlərdəsə arxayınçılıq yaranmasına əsas vermir" - Sədr müavini
"Əsas odur ki, uzun sürən intizara son qoyuldu, çoxlarını maraqlandıran suallara aydınlıq gətirildi. Ən başlıcası isə böyük əksəriyyətin arzu və istəyinə uyğun olaraq tədrisin ənənəvi formada başlanmasına kollegial qərar verildi.”
Bu sözləri Təhsil Nazirliyi yanında İctimai Şuranın sədr müavini Nadir İsrafilov deyib.
"Hesab edirəm ki, bu qərar bu gün üçün ən optimal variantdır. O ki, qaldı tədrisə başlanmasına niyə sentyabrın 15-i deyil, məhz 22-si və 29-una qərar verilməsinə, bu, sözü gedən məsələyə mərhələli keçidin təmin edilməsi ilə bağlı məsələdir. Bir də ki, tədrisin bir-iki həftə geriyə çəkilməsi, müddət baxımından elə də bir mahiyyət daşımır, lakin bu ertələnmənin proseslərin gedişatını izləmək, müvafiq təhlillər aparmaq və növbəti qərarlar qəbul etməyə hazırlıq baxımından böyük mənası və əhəmiyyəti var.
Ənənəvi tədrisə başlanılması, heç də əyani təhsilin bütün il boyu davamlı və dayanıqlı olacağı barədə kimlərdəsə arxayınçılıq yaranmasına əsas vermir. Hər şey mətbuat konfransında da xüsusi olaraq vurğulandığı kimi vaksinasiyadan, təhsil müəssisələrində sanitar-epidemioloji qaydalara və digər təhlükəsizlik normalarına necə riayət olunmasından asılı olacaq. Yoluxmanın səviyəsinə müvafiq olaraq lokal yanaşma tətbiq oluna bilər, ayrı-ayrı siniflərin distant təhsilə cəlb olunması, ayrı-ayrı məktəblərin müvəqqəti qapanması da istisna olunmur. Bu kimi halların qarşısının alınması üçün, orta ümumtəhsil məktəblərində müəyyən məhdudiyyətlər, ali məktəblərdə müəyyən limit tətbiq edilməsi nəzərdə tutulur. Yəqin ki, yaxın vaxtlarda ictimailəşəcək "Qaydalar”da bütün bu məqamlar öz əksini tapacaq.
Ümumiyyətlə götürdükdə isə, belə qərarın qəbul edilməsi gözlənilən idi. Çünki, dayanıqlı təhsilə Nazirliyin mövqeyi həmişə pozitiv olub. Nazirin də açıqlamalarının birində qeyd etdiyi kimi "Pandemiya dövründə insan inkişafını dondura bilmərik. Ona görə də təhsilin dayanıqlı formada təşkili təmin edilməlidir. Çalışmalıyıq ki, sosial-iqtisadi və digər amillər şagirdlərin təhsil almalarına təsir göstərməsin”.
