Xəbərlər / Müəllim
15 aprel 2021
1 045
Cəmiyyəti maariflənməyə sövq edən, inkişafa yönəldən ən aparıcı peşə müəllimlikdir
"Fəal müəllim" rubrikasının növbəti qonağı fəal, gənc müəllim Səltənət Qurbanovadır.
Səltənət müəllim 14 sentyabr 1991-ci ildə Gəncə şəhərində anadan olub. İlk təhsilini Gəncə şəhəri İ.Qayıbov adına 1 nömrəli tam orta məktəbində alıb. 2008-ci ildə məktəbi əla qiymətlərlə başa vurduqdan sonra 550 bal toplayaraq Gəncə Dövlət Universitetinin Filologiya fakültəsinin Azərbaycan dili və ədəbiyyatı ixtisasına qəbul olub. 2012- ci ildə həmin ixtisası fərqlənmə diplomu ilə bitirərək Gəncə Dövlət Universitetində magistratura pilləsi üzrə təhsilini davam etdirib. Magistr təhsili aldığı müddətdə məqalələri kitab və qəzetlərdə çap olunub. 2014-cü ildə Azərbaycan dili və ədəbiyyatın tədrisi ixtisasını fərqlənmə diplomu ilə bitirib.
Elə həmin il MİQ müsabiqəsindən yüksək bal toplayaraq Göygöl rayon Çaylı kəndində pedaqoji fəaliyyətə başlayıb. Fəaliyyətinin ilk vaxtlarından çalışqanlığı və innovativ dərsləri ilə hər kəsin sevgisini qazanıb, dərsləri qəzet və saytlarda işıqlandırılıb. Azərbaycan dili və ədəbiyyat müəllimi kimi fəaliyyətə başladıqdan sonra çalışdığı kənddə bu istiqamətdə hazırlaşan şagirdlərin sayı artıb.
Təhsil Nazirliyi tərəfindən keçirilən Təhsildə inkişaf və innovasiyalar üzrə 3-cü və 4-cü Qrant müsabiqələrinin qalibidir. 3-cü Qrant müsabiqəsində "Effektli öyrənmə”, 4-cü Qrant müsabiqəsində isə "Rəqəmsal zəka” layihələrinin rəhbəridir.
Ucqar kənd məktəbində təhsil alan şagirdlərinə vətənə sevgi, təhsilə bağlılıq, düzgün fərd kimi formalaşmaq xüsusiyyətlərini aşılamaq istəyi onu kənd məktəbində müəllimlik istəyindən uzaqlaşdırmayıb və artıq 6 ildir ki, həmin kənddə çalışır.
"Cəmiyyəti maariflənməyə sövq edən, inkişafa yönəldən ən aparıcı peşə müəllimlikdir” deyən Səltənət müəllim fəaliyyəti müddətində daima öyrənməyə, yeniliyə və dərslərini müasir təlim modellərinə uyğun qurmağa çalışıb. Beynəlxalq və yerli təlimlərdə, konfranslarda iştirak edərək sertifikatlarla təltif olunub.
Səltənət müəllim fəal təlim metodlarına əsaslanan dərsləri, keçirdiyi bilik yarışları və şagirdlərinin fəaliyyəti ilə rayon təhsilində daim diqqətdə olub və dərsləri nümunəvi dərslər kimi dinlənilib. Rayonun ictimai həyatında fəal gənclərdəndir. Dəfələrlə ictimai və təhsil sahəsində göstərdiyi fəaliyyətinə görə rayon icra hakimiyyəti, təhsil şöbəsi, məktəb rəhbərliyi və müxtəlif qurumlar tərəfindən fəxri fərman və mükafatlarla dəyərləndirilib.
Hazırda həm də Gəncə şəhər fizika, riyaziyyat və informatika təmayüllü respublika liseyində çalışır.
Gənc müəllim Səltənət Qurbanovaya fəaliyyətində uğurlar arzulayırıq.
