Xəbərlər / Müəllim
15 aprel 2021
1 469
Müsabiqənin müsahibə mərhələsi keçirilib
Bakı Şəhər üzrə Təhsil İdarəsinin nəzdindəki Təlimə Dəstək Mərkəzinə (TDM) işə qəbul müsabiqəsinin müsahibə mərhələsi keçirilib.
Müsahibə mərhələsində imtahanda müəyyən edilmiş balı toplayan 26 namizəd iştirak edib.
İşə qəbul müsabiqənin müsahibə mərhələsindən uğurla keçən namizədlər müvafiq vəzifələr üzrə təyinat alacaq.
Qeyd edək ki, üç mərhələdən ibarət müsabiqədə TDM-də Azərbaycan dili və ədəbiyyatı, riyaziyyat, ingilis dili, ibtidai sinif, fizika, kimya, biologiya, tarix, coğrafiya və informatika ixtisasları üzrə metodist (mentor) kimi çalışmaq arzusunda olan şəxslər iştirak edib.
TDM-in fəaliyyətinin əsas məqsədi ümumi təhsil müəssisələrində pedaqoji prosesin sistemli idarə olunmasının dəstəklənməsi, yeni yanaşmaların məktəblərdə çevik tətbiqinin təmin edilməsi, məktəbdaxili və məktəblərarası öyrədici mühitin zənginləşdirilməsi, təlimin keyfiyyətinin artırılması və fənn metodbirləşmələrinin fəaliyyətinin düzgün istiqamətləndirilməsindən ibarətdir.
TDM ümumi təhsil müəssisələrinə müasir təhsil proqramlarının tələblərinə uyğun dəstək verir və məktəblərdə keyfiyyətin təmin edilməsinə nail olmaq üçün müvafiq istiqamətlər üzrə metodiki yardım göstərir.
