Lənkəranda koronavirusa görə 2 şagird distant təhsilə keçirilib

Lənkəran rayonunda iki şagird pandemiya səbəbindən distant təhsilə cəlb olunub.

Lənkəran Şəhər Təhsil Şöbəsinin müdiri Ülviyyə Əliyeva "Report”un Cənub Mərkəzinə bildirib ki, hər iki şagird eyni ailənin üzvləridir:

"Distant təhsilə keçirilən şagirdlər 6 saylı məktəb-liseyin 6-cı sinif şagirdi Ə.Qurbanov və onun bacısı 4 saylı humanitar təmayüllü məktəb-liseyin 2-ci sinif şagirdi S.Qurbanovadır. Bu gündən etibarən onlar 14 gün müddətində onlayn qaydada dərslərini davam etdirəcəklər. Uşaqlar sağlamdır, lakin ailə üzvlərindən birində COVID-19 virusu aşkar olunduğundan belə bir qərar qəbul olunub”.

Ü.Əliyeva əlavə edib ki, təhsil müəssisələrində təhsil prosesi zamanı şagirdlərin, müəllimlərin, texniki işçi heyətinin, eləcə də valideynlərin və digər ailə üzvlərinin sağlamlığı nəzarətdə saxlanılır: "Məktəblərdə sosial məsafələrin qorunması, siniflərin dezinfeksiya olunması və şagird kontingentinin Nazirliyin təlimatına uygun olaraq, siniflərdə yerləşdirilməsi prosesi izlənilir və aparılan dərs prosesləri yoxlanılır. Bu günə qədər təhsil müəssisələrində hər hansı ciddi hal müşahidə olunmayıb”.

Qeyd edək ki, bu gün Lənkəranda orta yaşlı qadında COVID-19 virusu aşkar edilib.

"Report”un Cənub Mərkəzinin Lənkəran Şəhər Gigiyena və Epidemiologiya Mərkəzindən əldə etdiyi məlumata görə, həmin qadın və onun ailə üzvləri, eyni zamanda qadınla təmasda olan şəxslər müəyyən edilərək karantinə alınıb. Distant təhsilə keçirilən şagirdlər isə həmin qadının nəvələridir.