Xəbərlər / Qəhramanlarımız
31 dekabr 2020
4 644
Türkiyədə xüsusi təyinatlı kurs keçmiş Şəhidlik zirvəsinə ucalan Məhəmməd
İkinci Qarabağ savaşında Vətənin bölünməzliyi və müstəqilliyi uğrunda canından keçən qəhrəman Vətən övladlarından biri də Hüseynov Məhəmməd Alik oğludur.
Əslən Cəbrayıl rayonu Horovlu kəndindən olan Məhəmməd Hüseynov 28.10.1993-cü ildə Beyləqan rayonu Bahar qəsəbəsində anadan olmuşdur. Sərdar İmrəliyev adına Bahar kənd tam orta məktəbi bitirdikdən sonra Daxili İşlər Nazirliyinin Daxili Qoşunları XTD–də həqiqi hərbi xidmət keçmişdir. Xidmətini başa vurduqdan sonra Xüsusi Təyinatlı dəstədə müddətdən artıq hərbi qulluqçu kimi xidmətini davam etdirmişdir.
Türkiyənin İzmir şəhərində yerləşən Foca Jandarma Komando məktəbində 6 ay xüsusi təyinatlıların kursunu keçmiş, paraşutla atlama, əlbəyaxa döyüş və sualtı dalğıc kurslarında yüksək məharət göstərərək fərqlənmə diplomları ilə təltif edilmişdir. İkinci Qarabağ müharibəsində Murov dağ silsiləsində gedən döyüşlərdə iştirak etmiş, Murov zirvəsi azad edildikdən sonra öz doğma yurdu olan Cəbrayıl rayonu istiqamətində gedən döyüşlərə qoşulur. 08 oktyabrda Cəbrayıl rayonu ərazisində gedən döyüş zamanı qəhrəmancasına şəhidlik zirvəsinə ucalır.
Məhəmməd Hüseynov Azərbaycan Respublikası ərazilərinin işğaldan azad olunması və ərazi bütövlüyünün bərpa edilməsi zamanı döyüş əməliyyatlarına yüksək peşəkarlıqla hərbi qulluq vəzifəsini yerinə yetirərkən igidlik və mərdlik nümunəsi göstərdiyinə görə "Vətən uğrunda” medalı ilə təltif edilmişdir.
İgid əskər, Şəhadətin mübarək! Ruhunuz qarşısında baş əyirik! Allahdan bütün Şəhidlərimizə rəhmət diləyirik, nur içində yatın!
