Xəbərlər / Qəhramanlarımız
27 dekabr 2020
2 076
Ailəsindən eşitdikləri onda vətənə çox böyük məhəbbət yaratmışdır.
İkinci Qarabağ savaşında Vətənin bölünməzliyi və müstəqilliyi uğrunda canından keçən qəhrəman Vətən övladlarından biri də gizir Rüstəmov Vüsal Valeh oğludur.
12.03.1993-cü ildə Cəbrayıl rayonu Alıkeyxalı kəndində anadan olmuşdur. Vüsalın ailəsi Cəbrayıldan məcburi köçkün düşəndə o, 6 aylıq körpə idi. Doğma el – obasını görməsə də, ailəsindən eşitdikləri onda vətənə çox böyük məhəbbət yaratmışdır.
Yasamal rayonunda 53 saylı tam orta məktəbin məzunu olduqdan sonra 2011-ci ilin aprel ayında hərbi xidmətə gedir, 2013-cü ilin oktyabr ayının 1 – də hərbi xidmətdən qayıdır. Binəqədi neft şirkətində mühafizəçi vəzifəsində işləyir. Bir müddət işlədikdən sonra yenidən ordu sıralarına dönür. 2019-cu ildə Azərbaycan Respublikasının quru qoşunlarında gizir rütbəsini almaq üçün kursu bitirib, n saylı hərbi hissədə gizir rütbəsində tağım komandiri çalışır.
27 Sentyabr 2020-ci il Füzuli, Qubadlı, Zəngilan rayonlarının işğaldan azad olunmasında fəal iştirak edir. Vüsal Rüstəmov Azərbaycan Respublikası ərazilərinin işğaldan azad olunması və ərazi bütövlüyünün bərpa edilməsi zamanı döyüş əməliyyatlarına yüksək peşəkarlıqla hərbi qulluq vəzifəsini yerinə yetirərkən igidlik və mərdlik nümunəsi göstərdiyinə görə "Vətən uğrunda” medalı ilə təltif edilmişdir.
Vüsal Rüstəmov 10 noyabr 2020-ci ildə Şuşa uğrunda gedən döyüşlərdə qəhrəmancasına şəhid olmuş, Binəqədi rayonu Sulutəpə qəsəbəsindəki məzarlıqda dəfn edilmişdir.
Cənab gizir, Şəhadətin mübarək! Ruhunuz qarşısında baş əyirik! Allahdan bütün Şəhidlərimizə rəhmət diləyirik, nur içində yatın!
