Kənd müəllimi Həmkarlar İttifaqından narazıdır

Sözüm Azərbaycan Təhsil İşçilərinin Azad Həmkarlar İttifaqınadır:

Mən təhsil işçisi kimi bu qurumun 21 ildir ki, üzvüyəm. Yardımlı rayon Təhsil Şöbəsində çalışan hər bir işçidən məcburi qaydada ümumi maaşın 2%-ni tutaraq bu quruma köçürürlər... (Bizə elə deyirlər. Hansı formada tutulduğunu, hara yönəldiyini siz daha yaxşı bilirsiz...)

Bu 21 ildə mən bir dəfə ərizə ilə adı çəkilən qurumdan haqqım olaraq yardım edilməsini xahiş etmişəm və mənə 25 (iyirmi beş) manat maddi yardım ediblər. Onu qonşudan istəsəydim ən azı 50 verərdi. Hansı ki, bu iyirmi beş manat mənim iki aylıq həmkara köçürməmdən az bir məbləğdir...21 ildə şəxsən mənim maaşımdan ortalama 3000 (üç min) manat pul mənimsənilib.

İndi mən bir vətəndaş kimi, təhsil işçisi kimi, eləcə də İttifaqın üzvü kimi İttifaqdan hesabat tələb edirəm və məndən qopardıqları o pulun hansı istiqamətə yönəltdiklərini bəyan etmələrini istəyirəm. 21 ildə bir dəfə də olsun "bütovka" verməyiblər ki, gedib hansısa ponsianatda müalicə alasan. Hara gedir bu pullar, kimlər mənimsəyir, bizə bəlli deyil!? Amma yəqin ki, xərcləyənlər yaxşı bilir...

Mən açıq məktub şəklində cənab Prezidentimizə, bütün media orqanlarına və aidiyyəti orqanlara bu barədə geniş şəkildə müraciət edəcəyəm. Və xahiş edirəm İttifaq tərəfindən mənim öz pulumla mənə ödənilən hər hansı bir hesab silinsin və 21 ildə maaşımdan Həmkarlara tutulan məbləğ mənim özümə qaytarılsın...

Xanverdi Dadoşov Yardımlı rayonu Vərgədüz kənd tam orta məktəbin müəllimi

Məqalə Göndər