Xəbərlər
08 fevral 2017
2 794
Aqrar Universitetin əməkdaşları buraxılış sinif şagirdləri ilə görüşüb
Azərbaycanda kənd təsərrüfatının inkişafına qayğı və diqqət ilbəil artır. Qeyri neft sektorunun inkişafında önəmli yeri olan aqrar sahəyə gərəkli kadrlar isə təbii ki, Aqrar Universitetdə hazırlanır. Bu baxımdan sözügedən təhsil müəssisəsində bir sıra uğurlu layihələrin icrası da qarşıya qoyulan məqsədə doğru qətiyyətli addımların atıldığını təsdiq edir.
ADAU-nun mətbuat xidmətindən bildirilib ki, rektor, AMEA-nın müxbir üzvü, professor İbrahim Cəfərovun təşəbbüsü ilə "Universiteti tanıdaq” layihəsi çərçivəsində görülən işlər, təşkil edilən görüşlər sözün həqiqi mənasında orta məktəb məzunlarına ixtisas seçimində kifayət qədər yardımçı olur. Dövlət Aqrar Universitetinin növbəti belə bir görüşü isə Ağdam rayonunda keçirilib. Aqronomluq fakültəsinin dekanı, dosent Məhərrəm İsmayılovun, İctimai Elmlər və Multikulturalizim kafedrasının müdiri, professor Azad Bayramovun iştirak etdiyi görüşdə universitet haqqında dəyərli məlumatlar səsləndirilib.
Ağdam rayonu İcra Hakimiyyətinin başçısı Raqub Məmmədovun təşkilatçılığı ilə rayonun Quzanlı qəsəbəsində baş tutan görüşdə peşə yönümü ilə bağlı buraxılış sinif şagirdlərinə universitetin hədəf götürdüyü məqsədlərdən ətraflı danışılıb.
Toplantıda universitetdə kənd təsərrüfatında prioritet sayılan mütəxəsssis hazırlığında mövcud ixtisaslardan, dünya standartlarına cavab verən maddi texniki bazadan geniş söhbət açılıb, səsləndirilən suallar cavablandırılıb, universet haqqında video çarx nümayiş etdirilib.
