Xəbərlər
24 mart 2020
2 091
Tələbə qızın meyiti tapıldı
Fevralın 25-də gecə saatlarında Dənizkənarı Bulvarda sevgili olduqları deyilən, Tibb Universitetinin tələbələsi 1998-ci il təvəllüdlü Rzazadə Nəzakət Muğdət qızı və 1995-ci il təvəllüdlü Sabirabad rayon sakini, Məmmədov Babahüseyn Zöhrab oğlu özlərini dənizə ataraq intihar etməsi barədə xəbər verilmişdi .
25 yaşlı B.Məmmədov xilas edilərək, xəstəxananın reanimasiya şöbəsinə yerləşdirilmişdi. Lakin N.Rzazadənin meyitini aşkar etmək mümkün olmamışdı.
Oxu.Az-ın əldə etdiyi məlumata görə, Su Nəqliyyatında Polis İdarəsinin əməkdaşlarının səyi nəticəsində Nəzakət Rzazadənin meyiti tapılıb. Əraziyə Kiçikhəcmli Gəmilərə Nəzarət və Sularda Xilasetmə Dövlət Xidmətinin müvafiq xilasetmə qüvvələri və polis əməkdaşları da cəlb olunub.
Meyit sudan çıxarılaraq aidiyyəti üzrə təhvil verilib.
Qeyd edək ki, faktla bağlı Cinayət Məcəlləsinin özünü öldürmə həddinə çatdırma maddəsi ilə cinayət işi başlanıb, istintaq davam etdirilir.
