Müəllimlərimizin neçə faizi adi kompütüri açıb, bağlamağın yolunu bilir?-Müəllim fikri..

Artıq ənənəyə çevrilmiş bir qayda olaraq tədris ili finişə doğru yaxınlaşdıqca məktəblərdə kurikulumun ləğv olunacağı haqqında məlumatlar yenidən gündəmə çıxarılıb. Bu mövzu ilə əlaqədar bir çox informasiya vasitələri-xəbər saytları da bu məlumatları manşetə çıxararaq əməlli başlı ajiotaj yaradıblar. Belə məlumatlar "Facebook” sosial şəbəkəsində də geniş müzakirə olunmaqdadır. Maraqlı fakt ondan ibarətdir kli, artıq 8 ildən artıq bir müddət ərzində kurikulumla dərs keçən müəllimlərin bir çoxları artıq bu metodun ləğvini tələb edirlər. Ayrı-ayrı müəllim qruplarında tirajlanan bu məlumat ətrafında müəllimlər geniş diskussiya açıblar. Müxtəlif prizmalardan çıxış edən müəllimlərdən kimi keçmiş sovet təhsil sistemin üstünlüklərindən, kimi indiki təhsil sistemindəki qiymətləndirmə metodlarının yalnışlığından, kimi dərsliklərin bərbad halda olmasından və digər məsələlərdən arqumentlər gətirirlər. Dilə gətirilən fikirlərdən biri də bir çox müəllimlərin repititorluq fəaliyyəti ilə bağlıdır ki, guya repititor müəllimlər olmasa, təhsilimiz birdəfəlik batar.

Bütün bunlarla yanaşı əksəriyyətinin ümumi ortaq məxrəcə gəldikləri bir nöqtə də var ki, o da keçmiş sovet təhsil sisteminə "qayıdış”la bağlıdır...

Heç şübhəsiz ki, Azərbaycan təhsil sistemində yetərincə çatışmazlıqlar var və heç də bu çatışmazlıqları danmaq olmaz. Lakin bununla yanaşı bir çox müəllimlərimizin səsləndirdikləri fikirlərin də qeyri səmimi olduğu qənaətindəyəm...

Öz məktəbimdə apardığım çoxsaylı müşahidələr və ayrı-ayrı məktəblərdən aldığım geniş məlumatlara əsaslanaraq aşağıdakı qənaətə gəlmişəm: 

Dünyada baş verən inkişaf proseslərinə uyğun olaraq bu proseslərdən kənarda qalmaq mümkün deyil və əks təqdirdə bu cəmiyyətimizin məhvinə gətirib çıxara bilər. Söhbət ondan getmir ki, bu gün təhsil sistemimiz kurikulumdan imtina etsə hər şeyin sonu ola bilər. Söhbət ondan gedir ki, cəmiyyətimizi sanki, bir sükunət bürüyüb. Əsrimiz İKT (İnformasiya kommunikasiya texnologiyaları) əsridir. Tək kitab-dəftərlə iş aşmır. Qoy bu gün lap kurikulum keçmiş sovet təhsil sistemi ilə əvəz olunsun. Yaxşı, müasir texnologiyalarsız tək kitab-dəftərləmi bu günkü şagirdin qabağınamı çıxmaq istəyirik? Gəlin reallıqdan çıxış edək. Hər hansı bir təhsil sistemini təqdir etmək fikrindən çox-çox uzağam. Lakin, gəlin görək müəllimlərimizin neçə faizi dünyada və ətrafımızda baş verən inkişafa uyğun günün tələblərinə cavab verir. Uzağa getməyə ehtiyac yoxdur. Müəllimlərin diaqnostik qiymətləndirmədən göstərdikləri ümumi nəticəyə baxmaq kifayət deyilmi? Bu gün orta məktəb şagirdi qarşısına çıxan müəllimlərimizin neçə faizi adi kompütüri açıb, bağlamağın yolunu bilir? Keçmiş sovet təhsil sisteminin üstünlüklərini gözümüzə salanların nəzərinə bircə faktı çatdırım ki, keçmiş SSRİ məkanında ən tanınmış pristij universitet olan MDU-nun dünyanın 100 universiteti arasında adı yoxdur. Ona görə digər ölkələrin, xüsusən, artıq keçmişdə qalan sovet təhsil sisteminin nostalgiyasını yaşamaqdansa, Azərbaycanımızın təhsilinin inkişafına nail olmaq lazımdır... Nə yolla olursa, olsun...Bundan sonra nə sovet təhsil sistemi olmayacaq nə nə sovetlər bir daha dirilməyəcək...